ວັນທີ່ 10 ມີນາ 2021 ຜ່ານມານີ້ ທີ່ ວັດພຣະພຸດທະບາດແອວຂັນ ບ້ານນາຄາຍ ເມືອງໄຊທານີ ເປີດງານປະຕິບັດທັມກັມມະຖານປະຈຳປີເພື່ອເປັນການສົ່ງເສີມ ແລະ ເຜີຍແຜ່ພຸດທະສາສະນາສູ່ຊາວພຸດທະສາສະນິກກະຊົນບັນດາເຜົາ ເພື່ອສຶບຕໍ່ງານປະຕິບັດທັມຂອງ ອົງການພຸດທະສາສະນາສຳພັນ ເມືອງໄຊທານີ ເພື່ອເປັນການຮັກສາພຸດທະສາສະນາ ຮີດຄອງ ປະເພນີ ວັດທະນະທຳອັນດີງາມຂອງຊາດລາວໃຫ້ຫມັ້ນຄົງ ຈະເລີນຮຸ່ງເຮື່ອງ ແລະ ເພື່ອເປັນການເຕົ້າໂຮມຄວາມສາມັກຄີ ຂອງປະຊາຊົນລາວບັນດາເຜົ່າ.

ໃນງານປະຕິບັດທັມຄັ້ງນີ້ໄດ້ຮັບຄວາມເມດຕາ ເປັນປະທານເປີດພິທີໂດຍ ພຣະຍອດຄຳສຸນທະຣະຍານ (ສີທົນ ໄຊຍະວົງສອນ) ຄະນະບໍລິຫານປະຈຳການສູນກາງ ອພສ,ຫົວໜ້າກັມມາທິການເຜີຍແຜ່ສີລະທັມ ແລະປະຕິບັດກັມມະຖານ ສູນກາງ ພ້ອມດ້ວຍພຣະເຖຣານຸເຖຣະເຂົ້າຮ່ວມ.

ຝ່າຍຄະລາວາດເປັນກຽດເຂົ້າຮ່ວມຂອງ ທ່ານ ຄຳປະດິດ ເຂັມມານິດ ຄະນະກັມມະການພັກນະຄອນຫຼວງ,ເລຂາພັກເມືອງ,ເຈົ້າເມືອງໄຊທານີ ພ້ອມດ້ວຍການຈັດຕັ້ງທຸກພາກສ່ວນທີ່ກ່ຽວຂ້ອງ.

ໃນພິທີພຣະອາຈານ ໂສພາ ສີບຸນເຮືອງ ຮອງເຈົ້າຄະນະເມືອງໄຊທານີ ໄດ້ກ່າວຈຸດປະສົງຂອງພິທີປະຕິບັດທັມກັມມະຖານ ໂດຍມີຜູ້ເຂົ້າຮ່ວມທັງຫມົດ 150 ອົງ/ທ່ານ ພະສົງ 60 ສຳມະເນນ 60 ແລະ ແມ່ຂາວ 30 ຕົນ.

ໂຄງການປະຕິບັດທັມມກັມມະຖານ ຈະໄດ້ດຳເນີນເປັນເວລາ 7 ວັນ ແຕ່ວັນທີ 10-17 ມີນາ 2021.