ວັນທີ 02 ມີນາ 2021 ຜ່ານມານີ້ ທີ່ ວັດສຸວັນນະປະດິດ ບ້ານນາດີ ເມືອງນາຊາຍທອງ ນະຄອນຫຼວງວຽງຈັນ.ຄະນະບໍລິຫານງານປະຈຳການ ສູນ​ກາງ​ ອພສ ເຊີ່ງນຳໂດຍ ພຣະ​ຫຼັກ​ແກ້ວ​ມະຫາ​ສຸເມທາທິບໍດີ (ມະຫາ​ບຸນ​ມາ​ ສິມມາພົມ​) ຮັກສາ​ການ​ປະທານ​ສູນກາງ​ອົງການ​ພຸດ​ທະ​ສາສະໜາ​ສັມພັນ​ ແຫ່ງ​ ສ​ປ​ປ​ ລາວ,ພຣະຫຼັກແກ້ວມະຫາວໍຣະຍານາທິບໍດີ (ມະຫາເຫວດ ມະເສໄນ ) ຮອງປະທານສູນກາງອົງການພຸດທະສາສະນາສຳພັນແຫ່ງ ສປປ ລາວ ອົງຊີ້ນຳລວມວຽກງານເຜີຍແຜ່ສີລະທັມ ແລະ ປະຕິບັດທັມກັມມະຖານສູນກາງ ອພສ ພ້ອມດ້ວຍ ຄະນະບໍລິຫານງານປະຈຳການສູນກາງ ອພສ. ໄດ້ລົງ​ຕິດຕາມ,​ຢ້ຽມຢາມ ແລະ ຮັບຟັງຄວາມຄືບໜ້າໃຫ້ການແປພຣະໄຕຣປີດົກ ສະບັບພາສາບາລີລາວ,ບາລີທັມ ແລະ ພາສາລາວ.

ໃນການລົງຢ້ຽມຍາມໃນຄັ້ງນີ້ ພຣະມະຫາອຸດອນ ອະນຸດຕະໂຣ ຫົວໜ້າກອງຕຳລາຂອງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ໄດ້ລາຍງານຜົນສຳເລັດຂອງການແປພຣະໄຕຣປິດົກດັ່ງກ່າວ ເຊີ່ງມີຢູ່ 3 ສະບັບ ພາສາບາລີລາວ ສຳເລັດ 80% ພາສາທັມ 70% ແລະ ພາສາລາວ ໄດ້ສຳເລັດ90%.

ສຳຫລັບການແປລພຣະໄຕຣປິດົກນີ້ມີຂໍ້ສະດວກ ແລະ ຂໍ້ຍຸ້ງຍາກດັ່ງນີ້ ຂໍ້ສະດວກຄືໄດ້ມີການແປຕໍ່ເນື່ອງ ແລະ ໄດ້ມີບັນດາພຣະມະຫາປະຣຽນທັມ ເຊີ່ງມີຄວາມຮູ້ ຄວາມສາມາດພາສາບາລີ ມາຊ່ວຍໃນການແປ ສ່ວນຂໍ້ຍຸ້ງຍາກ ພຣະມະຫາປະຣຽນທັມຈຳນວນຫນື່ງຍັງມີຄວາມຍຸ້ງຍາກໃນການໄປ-ມາ ແລະ ຍັງຄາກິດຈະວັດພາຍໃນວັດຂອງຕົນ.

ຖ້າວ່າມີງົບປະມານ,ມີທີມງານທີ່ເຂັ້ມແຂງ ແລະ ປະຈຳຢູ່ວັດສຸວັນນະປະດິດເປັນປົກກະຕິ ຄາດວ່າຈະສຳເລັດການແປພຣະໄຕຣປິດົກທັງສາມສະບັບ 100% ໃນປີ 2021 ນີ້.

ຂໍເຊີນຊວນຊາວພຸດທະສາສະນິກກະຊົນທັງຫຼາຍ ທີ່ເຫຼີ້ມໃສ່ສັດທາໃນພຣະພຸດທະສາສະໜາຮ່ວມອະປະຖັມ ປັດໄຈ ຕາມກຳລັງສັດທາໃນການແປພຣະໄຕຣປິດົກ.

ສາມາດຕິດຕໍ່ພົວພັນໄດ້ ທີ່ຫ້ອງການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ອພສ.ວັດທາດຫຼວງເໜືອ ເມືອງໄຊເສດຖາ ນະຄອນຫຼວງວຽງຈັນ.ໂທລະສັບ 02022224883