ສູນຄຸ້ມຄ້ອງກໍລະນີໂຄວິດ-19 ແຂວງສະຫວັນນະເຂດ ໄດ້ຮັບເຄື່ອງ ອຸປະໂພກ-ບໍລິໂພກ ພ້ອມເງິນສົດ ລວມມູນຄ່າປະມານ 80 ລ້ານກີບ ຈາກ ກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ (ກຜປຖ) ສູນກາງອົງການພຸດທະສາສະໜາສຳພັນ ແຫ່ງ ສປປ ລາວ ( ອພສ).
ໂດຍການຊີ້ນຳຂອງ ພຣະຫຼັກແກ້ວມະຫາວໍລະຍານາທິບໍດີ (ມະຫາເຫວດ ມະເສໄນ) ຮອງປະທານ,ອົງຊີ້ນຳລວມວຽກງານ ກຜປຖ,ເຈົ້າອາທິການວັດສີສະເກດ ເຊີ່ງມີຄອບຄົວ ຕຸນີ່ ທອງສະບາ ເປັນເຈົ້າສັດທາຫຼັກ ພ້ອມດ້ວຍສິດສານຸສິດ ພຸດທະສາະນິກກະຊົນຫຼາຍພາກສ່ວນ ພາຍໃນ ເມືອງຈັນທະບູລີ, ເມືອງຫາດຊາຍຟອງ ແລະ ເມືອງໄຊທານີ້ ກໍ່ໄດ້ຊ່ວຍສົມທົບເຄື່ອງຊ່ວຍເຫຼືອໃນຄັ້ງນີ້ດ້ວຍ.
ພິທີມອບໄດ້ຈັດຂື້ນ ໃນວັນທີ 16 ສິງຫາ 2021ຜ່ານມານີ້ ທີ່ວັດສີສະເກດສະຕະສະຫັສສາຣາມ ເມືອງຈັນທະບູລີ ນະຄອນຫຼວງວຽງຈັນ ເຊີ່ງເມດຕາມອບໂດຍ ພຣະຫຼັກແກ້ວມະຫາວໍລະຍານາທິບໍດີ(ມະຫາເຫວດ ມະເສໄນ) ແລະ ຕ່າງໜ້າຮັບໂດຍ ທ່ານ ທອງໃສ ໄຊຍະວົງຄຳດີ ກຳມະການພັກແຂວງ,ຫົວໜ້າຫ້ອງວ່າການປົກຄອງ, ຄະນະສະເພາະກິດເພື່ອສະກັດກັ້ນ ແລະ ຄວບຄຸມການແຜ່ລະບາດພະຍາດໂຄວິດ-19 ແຂວງສະຫວັນນະເຂດພ້ອມດ້ວຍຄະນະ.
ຈຸດປະສົງການລະດົມເຄື່ອງຊ່ວຍເຫຼື່ອໃນຄັ້ງນີ້ ແມ່ນຊ່ວຍແບ່ງເບົາ ແລະ ແກ້ໄຂຄວາມບໍ່ພຽງພໍຕໍ່ການຄວບຄຸມຈຳກັດບໍລິເວນຂອງແຮງງານລາວທີ່ມາຈາກປະເທດເພື່ອນໄກ້ຄຽງ.
ແລະເນື່ອງຈາກພະຍາດໂຄວິດຍັງຮຸກຮານຫຼາຍຢູ່ ທາງພຣະສົງເຮົາກໍ່ບໍ່ໄດ້ນິ້ງນອນໃຈ ພະຍາຍາມເປັນສື່-ປະຊາສຳພັນ ລະດົມເຄື່ອງຊ່ວຍເຫຼືອຈາກຫຼາຍພາກສ່ວນ ແລະ ຍັງຈະໄດ້ລະດົມໄປເລື່ອຍໆ.
ພະຫຼັກແກ້ວຍັງໄດ້ບອກເຕີ່ມອີກວ່າ ໃຫ້ປະຊາຊົນລາວເຮົາມີສະຕິ ບໍ່ປະມາດ ເພາະຄວາມປະມາດເປັນຫົນທາງແຫ່ງຄວາມຕາຍ ໂດຍສະເພາະ ຄົນທີ່ຍັງບໍ່ຕິດ ກໍ່ຢ່າໄດ້ປະມາດ ເລື່ອງຂອງອະບາຍະມຸກ ການຫຼີ້ນກິນຝຸ້ມເຝືອຍ ຢາທີ່ເປັນກຳລັງສຳຄັນ ຄື ການປະຕິບັດຕາມແນວທາງຂອງພັກຂອງລັດ.
