ວັດປ່ານາຄູນນ້ອຍ ເມືອງນາຊາຍທອງ ນະຄອນຫຼວງວຽງຈັນ ໄດ້ຈັດກິດຈະກຳເຝິກເທດ-ເຝິກທັມ ປະຈຳທຸກວັນສິນ 8 ສິນ 15 ຄ່ຳ ໃນໄລຍະເຂົ້າພັນສາຂອງພຣະພິກຂຸສະມະເນນ.
ຄຳວ່າ ຈຳພັນສາ ຫຼື ຈຳວັສສາ ແປລວ່າ ພັກລະດູຝົນ ຕາມຕົ້ນເຄົ້າພຣະພຸດທະບັນຍັດວ່າ ພຣະພິກຂຸສະມະເນນ ເມື່ອລະດູຝົນມາເຖີງຈະຕ້ອງເຂົ້້າພັນສາ ຫຍຸດການສັນຈອນໄປມາຕາມບ່ອນຕ່າງໆ ຍົກເວັ້ນມີເຫດຈຳເປັນ.
ແນວໃດກໍ່ດີ ໄລຍະຈຳພັນສານີ້ ເປັນໂອກາດທີ່ພຣະສົງສະມະເນນໄດ້ຢູ່ປະຈຳທີ່ ໄດ້ມີເວລາສຶກສາປະຕິບັດທັມ ໄດ້ໄກ້ຊິດກັບຄູບາອາຈານ ແລະ ສະຫະທຳມິກໃນອາວາສຂອງຕົນ.
ຖ້າຈະບອກວ່າ ອາວາສ ຫຼື ວັດ ເປັນສະຖານສຶກສາທັມມະ ແຫ່ງທຳອິດຂອງ ພຣະພິກຂຸສະເນນກໍ່ຄົງບໍ່ຜິດ ເພາະດັງເດີມໃນສະໄໝກ່ອນ ກໍ່ມີວັດວາອາຣາມ ເປັນສະຖານສຶກສາ ກັບ ພຣະສະຫະທຳມິກອົງທີ່ບວດກ່ອນ ເປັນຄູ ບອກສອນທັມມະວິນັຍ ດ້ວຍວິທີ ມຸກຂະປາຖະ ຄື ດ້ວຍການຟັງປາກຕໍ່ປາກ.
ນອກຈາກການສຶກສາ ປະຕິບັດແລ້ວ ວຽກງານການເທດສະໜາ ການຖ່າຍຖອດທັມມະ ໃຫ້ພຸດທະສາສະນິກກະຊົນໄດ້ເຂົ້າໃຈ ຖືເປັນວຽກງານໜື່ງທີ່ສຳຄັນ ເພາະທັມມະຂອງພຣະຜູ້ມີພຣະພາກເຈົ້າ ເປັນຂອງລະອຽດອ່ອນ ເລິກເຊີ່ງ ຮູ້ເຫັນໄດ້ຍາກ ຈຳເປັນຕ້ອງຮຽນຮູ້ ແລະ ເຂົ້າໃຈ ຢ່າງເລິກເຊີ່ງກ່ອນ.
ຈະເຫັນໄດ້ວ່າ ຕັ້ງແຕ່ອະດິດຈົນເຖີງປັດຈຸບັນ ວຽກກງານອັນສຳຄັນຂອງພຣະພິກຂຸສະມະເນນ ກໍ່ຄື ການສຶກສາ ແລະ ປະຕິບັດຕົນ ໃຫ້ຮູ້ ແຈ້ງ ເຫັນຈິງໃນອະຣິຍະສັດຈະທັມ ຕະຫຼອດຈົນລະໝົດສິ້ນ ເຊີ່ງອາສະວະກິດເລດ ແລ້ວ ບອກສອນຜູ້ອື່ນໃຫ້ຮູ້ຕາມ ດັ່ງພຸດທະພົຈວ່າ ພິກຂຸທັງຫຼາຍພວກເຈົ້າຈົ່ງທ່ຽວຈາຣິກໄປ ເພື່ອປະໂຫຍດແກ່ຄົນຈຳນວນຫຼາຍ ເພື່ອຄວາມສຸກແກ່ຄົນ ເພື່ອອະນຸເຄາະສັດໂລກ ເພື່ອປະໂຫຍດ ເກື້ອກູນ ເພື່ອຄວາມສຸກ ແກ່ເທວະດາ ແລະ ມະນຸດທັງຫຼາຍ.
ໃນກິດຈະກຳເຝິກເທດ-ເຝິກທັມ ສີິນ 8 ຄຳ່ ຜ່ານມານີ້ ມີພຣະເຝິກເທດຢູ່ 8 ອົງ ເຝິກເທດອົງລະ ຢ່າງນ້ອຍ 15 ນາທີ.ໂດຍໃນໂອກາດນີ້ ພຣະຍອດຄຳ ສີທົນ ໄຊຍະວົງສອນ ຫົວໜ້າກັມມາທິການເຜີຍແປ່ສີລະທັມ ແລະ ປະຕິບັດກັມມະຖານສູນກາງ,ເຈົ້າອະທິການວັດປ່ານາຄູນນ້ອຍ ຍັງໄດ້ໃຫ້ຄວາມຄິດເຫັນກັບນັກເຝິກເທດ ພໍສະຫຼຸບໄດ້ວ່າ ຄວນອ່ານ ແລະ ຟັງທັມມະຫຼາຍໆ ແລະ ການເທດນີ້ຄວນແຍກເລື່ອງ ຫຼື ຫົວຂໍ້ທັມໃຫ້ມັນຈັດເຈນ ບໍ່ໃຫ້ຄຸມເຄື່ອກັນ.
