ກະຖິນ ເປັນພິທີ ຫຼື ວິທີການພິເສດ ທີ່ພຣະສົງໄດ້ປະຕິບັດມາແຕ່ສະໄຫມພຸດທະການຈົນເຖີງປັດຈຸບັນ ເພື່ອໃຫ້ພຣະພິກຂຸສົງທີ່ຢູ່ຈຳພັນສາຕະຫລອດ 3 ເດືອນ ໄດ້ປ່ຽນຜ້າຈີວອນໃຫມ່.ໃນສະໄຫມພຸດທະການ ຊີວິດຂອງພຣະສົງບໍ່ໄດ້ສະດວກສະບາຍ ຕ້ອງອາໄສຢູ່ໃນປ່າ ໃນຖ້ຳ ກ້ອງຮົ່ມໄມ້ ຈີວອນກໍ່ບໍ່ໄດ້ຫາງ່າຍ ແລະ ບໍ່ໄດ້ສຳເລັດພ້ອມນຸ່ງຫົ່ມ ເຫມືອນຢ່າງປັດຈຸບັນນີ້ ເມື່ອພຣະພິກຂຸສົງໄດ້ຮັບຖວາຍຜ້າຈີນວອນມາແລ້ວ ການຕັດຫຍິບຜ້າ ເຮັດຈີວອນໄວ້ນຸ່ງຫົ່ມ ບໍ່ວ່າຈະເປັນ ຜ້າກະຖິນ ຫລື ແມ້ແຕ່ ຈີວອນທີ່ບໍ່ແມ່ນຜ້າກະຖິນ ຖ້າພຣະພິກຂຸເຮັດເອງກໍ່ຖືວ່າເປັນງານໃຫຍ່.
ກະຖິນ ຕາມສັບ ແປວ່າ ໄມ້ສະດືງຄື ຂອບໄມ້ຊະນິດຫນື່ງສຳຫລັບດຶງຜ້າໃຫ້ເຄັ່ງ ເພື່ອສະດວກໃນການຫຍິບ ສະນັ້ນ “ກະຖິນ” ກໍ່ຄື ການຖວາຍຜ້າຂອງຄະລາວາດແກ່ພຣະສົງນັ້ນເອງ ໂດຍຜ້ານັ້ນຈະຖືກນຳມາຕັດຫຍິບ ແລະ ຍ້ອມເປັນຈີວອນໂດຍພິກຂຸພາຍໃນວັດໃຫ້ສຳເລັດກ່ອນຕອນເຊົ້າມື້ໃຫມ່ ແລະ ພິກຂຸຜູ້ຮັບຈີວອນນັ້ນຈະອະທິຖານໃຊ້ຜ້າກະຖິນນັ້ນນຸ່ງຫົ່ມແທນຈີວອນຜື່ນເກົ່າ ເອີ້ນວ່າ “ການກະຖິນ”
ດັ່ງນັ້ນ,ການໄດ້ຖວາຍຜ້າກະຖິນ ຈື່ງເປັນໂອກາດພິເສດ “ເປັນກາລະທານ” ຄື ມີເທື່ອດ່ຽວໃນຫນື່ງປີ ແລະ ມີຂື້ນພາຍໃນໜຶ່ງເດືອນຫຼັງຈາກອອກພັນສາເທົ່ານັ້ນ. ການຖວາຍຜ້າກະຖິນຍັງເປັນ “ສັງຄະທານ” ຄື ການຖວາຍໃຫ້ສົງຫມູ່ໃຫຍ່ ບໍ່ໄດ້ສະເພາະເຈາະຈົງອົງໃດອົງຫນື່ງ. ຫລັງຈາກນັ້ນກໍ່ຈະເປັນເລື່ອງຂອງພຣະສົງວ່າຈະພິຈາລະນາໃຫ້ໃຜເປັນຜູ້ຮັບ. ປົກກະຕິ ຜ້າກະຖິນຈະມອບໃຫ້ແກ່ພິກຂຸສົງທີ່ມີຈີວອນເກົ່າທີ່ສຸດພຽງອົງດ່ຽວຕາມມະຕິຂອງສົງພາຍໃນວັດ.
ຕຳນານກ່າວວ່າ ການຫຍິບຜ້າຈີວອນນັນ ພຣະເຖຣານຸເຖຣະຕ່າງໆຈະມາຊ່ວຍກັນ ເປັນຕົ້ນວ່າ ພຣະສາລີບຸດ ພຣະມະຫາໂມຄັນລານະ ພຣະມະຫາກັດສະປະ ແມ້ແຕ່ ພຣະບໍລົມມະສາສະດາສັມມາສັມພຸດທະເຈົ້າກໍ່ສະເດັດລົງມາຊ່ວຍ ສ່ວນພິກຂຸສາມະເນນກໍ່ຊ່ວຍກັນຂົນຂວາຍ ອຸບາສົກອຸບາສິກາກໍ່ຈັດຫານ້ຳດືມ ນ້ຳປານະ ເປັນຕົ້ນ.
ຕົກມາປັດຈຸບັນນີ້ ຜ່ານການເວລາອັນຍາວນານ ໂດຍສະເພາະ ໃນໄລຍະການລະບາດຂອງພະຍາໂຄວິດເຮັດໃຫ້ວິຖີຊີວິດ ສັງຄົມ ແລະ ວັດທະນະທຳ ອາດປ່ຽນໄປ ແຕ່ ພິທີຖວາຍກະຜ້າຖິນ ກໍ່ຄື ພຸດທະບັນຍັດນີ້ ຍັງຄົງໄດ້ຮັບການສຶບຖອດຈາກຮຸ່ນສູ່ຮຸ່ນມາຕັ້ງແຕ່ພຸດທະການ.
ແນວໃດກໍ່ດີ, ຄົນລາວຊາວພຸດ ຜູ້ມີຈິດສັດທາສາມາດຮ່ວມເຮັດບຸນກະຖິນກັບທາງວັດປ່ານາຄູນນ້ອຍ ສຳນັກວັດປະຕິບັດວິປັດສະນາກັມມະຖານ ຕາມກຳລັງສັດທາ ຜ່ານ QR Code ຫຼື ບັນຊີເລກທີ່ 220-120-6166974 ຊື່ບັນຊີ Sithon Xayavongsone Monk. ຫຼື ເຂົ້າຮ່ວມພິທີຕາມປະເພນີຢ່າງກະທັດຮັດ ໂດຍ ການປະຕິບັດຕາມມາດຕະການປ້ອງກັນ ຄວບຄຸມ ແລະ ສະກັດກັ້ນການລະບາດຂອງພະຍາດ Covid-19 ຢ່າງເຂັ້ມງວດ.
ພິທີຈະໄດ້ຈັດຂື້ນທີ່ວັດປ່ານາຄູນນ້ອຍ ເມືອງນາຊາຍທອງ ນະຄອນຫຼວງວຽງຈັນ.
ໃນວັນເສົາ ທີ 13 ພະຈິກ 2021 ເປັນມື້ຫ້າງຫາກະກຽມ ຕັ້ງກອງບຸນກະຖິນສາມັກຄີ ແລະ ສູດພຣະປະຣິຕະມຸງຄຸນ ເວລາ 18:00.
ວັນອາທິດ ທີ 14 ພະຈິກ 2021 ເວລາ 9:30 ເປັນ ພິທີຖວາຍຜ້າກະຖິນສາມັກຄີີ ແກ່ຄະນະສົງ.
ຂໍອວຍພອນໃຫ້ທ່ານ ແລະ ຄອບຄົວ ທີ່ຮ່ວມເປັນເຈົ້າພາບກອງບຸນກະຖິນສາມັກຄີໃນຄັ້ງນີ້ ຈົ່ງມີແຕ່ຄວາມສຸກ ຄວາມຈະເລີນ ດ້ວຍພອນໄຊ ສີ່ປະການ ຄື ອາຍຸ ວັນນະ ສຸຂະ ພາລະ ດ້ວຍເທີ້ນ.
