ໃນວັນທີ 16 ກຸມພາ 2021 ຜ່ານມານີ້ ກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ໄດ້ຈັດກອງປະຊຸມສະຫຼຸບວຽກງານ 5 ປີ ( 2016-2021) ທີ່ຫໍ ທັມມະສະພາ ວັດທາດຫຼວງເໜືອ ເມືອງໄຊເສດຖາ ນະຄອນຫຼວງວຽງຈັນ.

ໂດຍໄດ້ຮັບຄວາມເມດຕາເປັນປະທານກອງປະຊຸມຂອງ ພຣະຫຼັກແກ້ວມະຫາວໍຍານາທິບໍດີ (ມະຫາເຫວດ ມະເສໄນ) ຮອງປະທານສູນກາງອົງການພຸດທະສາສະໜາສຳພັນແຫ່ງ ສປປ ລາວ ອົງຊີ້ນຳລວມ ພ້ອມດ້ວຍ ພຣະຍອດຄຳ ພຣະຫຼັກຄຳ ພຣະຄູ ພຣະປີຊາ ແລະ ພຣະເຖຣານຸເຖຣະເຂົ້າຮ່ວມ.

ຝ່າຍຄະລາວາດເປັນກຽດເຂົ້າຮ່ວມຂອງ ທ່ານ ນາງຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດພ້ອມດ້ວຍ ຄອບຄົວການນຳ,ການນຳພັກລັດ,ຜູ້ຊົງຄຸນວຸດທິ ແລະ ຜູ້ໃຫ້ການອຸປະຖັມວຽກງານພຸດທະສາສະໜາ.

ໃນທີປະຊຸມ ພຣະຍອດຄຳ ສຸນທະລະຍານ (ສີທົນ ໄຊຍະວົງສອນ) ຫົວຫນ້າກັມມາທິການເຜີຍແຜ່ສິລະທັມແລະປະຕິບັດກັມມະຖານສູນກາງ ໄດ້ຜ່ານບົດລາຍງານການເຄື່ອນໄຫວໃນໄລຍະ 5 ປີ ຜ່ານມາ ແລະ ທິດທາງແຜນການ 5 ປີຕໍ່ຫນ້າ 2021-2025. ເຊີ່ງຍົກໃຫ້ເຫັນຜົນງານການເຄື່ອນໄຫວ ທັງ ຈຸດດີ ຈຸດຄົງຄ້າງ ແລະ ບົດຮຽນທີ່ຖອດຖອນໄດ້.

ກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ເປັນໜຶ່ງໃນຫ້າກັມມາທິການ ທີ່ມີສາຍໄຍການຈັດຕັ້ງຂຶ້ນ ກັບສູນກາງອົງການພຸດທະສາສະໜາສັມພັນແຫ່ງ ສປປ ລາວ ໂດຍມີພາລະບົດບາດ, ສິດ ແລະ ໜ້າທີ່ ລະບົບການຈັດຕັ້ງທີ່ຊັດເຈນ.

ໃນໄລຍະທີ່ຜ່ານມາ ກັມມາທິການ ໄດ້ຈັດຕັ້ງ ແລະ ຜັນຂະຫຍາຍມະຕິກອງປະຊຸມໃຫຍ່ ຜູ້ແທນພຣະສົງ ທົ່ວປະເທດ ສະໄໝທີ VII ຂອງອົງການພຸດທະສາສະໜາ ສຳພັນລາວ ທີ່ ນະຄອນຫຼວງວຽງຈັນ, ຄັ້ງວັນທີ19-20 ກັນຍາ 2016. ທາງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ກໍ່ໄດ້ມີການຈັດຕັ້ງປະຕິບັດ ວຽກງານ ແຜນການ ປະຈຳປີ 2017 ມີດັ່ງນີ້: ກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ແມ່ນໜຶ່ງ ໃນ 5 ກັມມາ ທິການ ທີ່ໄດ້ນຳເອົາຫຼັກສີລະທັມ ລົງເຜີຍແຜ່ ໃຫ້ແກ່ປະຊາຊົນລາວບັນດາເຜົ່າ ໂດຍຕິດພັນກັບແນວທາງນະໂຍບາຍ ຂອງ ພັກ-ລັດ ວາງອອກໃນແຕ່ລະໄລຍະ ເພື່ອຮັກສາໄວ້ເຊິ່ງ ຮີດຄອງປະເພນີແລະ ວັດທະນະທຳ ອັນດີງາມ.

ສຳຫລັບ ທິດທາງແຜນການຂອງ ກຳມາທິການເຜີຍແຜ່ສີລະທຳ ແລະ ປະຕິບັດກຳມະຖານ ໃນໄລຍະ 5 ປີ 2021-2025 ມີ່ດັ່ງນີ້

-ປັບປູງຄຸ້ມຄອງບໍລິຫານຫ້ອງການໃຫ້ມີແບບແຜນທີ່ຊັດເຈນ

-ສຶບຕໍ່ການເຜີຍແຜ່ສີລະທັມກັມມະຖານ ໃຫ້ສອດຄອງກັບແນວທາງຂອງພັກ ແລະ ລັດ

-ຮັບປະກັນນຄວາມເປັນເອກະພາບແຕ່ຂັ້ນສູນກາງຮອດທ້ອງຖິ່ນ

-ສຶບຕໍ່ສ້າງຄູ່ມືຫຼັກສູດຕ່າງໆ ບົນພື້ນຖານຫຼັກພຣະທັມມະນິນັຍ,ທັມມະນູນສົງລາວ,ດຳລັດ ແລະບັນດາຂໍ້ກຳນົດຕ່າງໆທີ່ວ່າງອອກແຕ່ລະໄລຍະ

-ສຶບຕໍ່ສ້າງສູນປະຕິບັດທັມ ແລະ ສ້າງເຄື່ອຄ່າຍການຮ່ວມມືວຽກງານເຜີຍແຜ່ສີລະທັມ ແລະ ປະຕິບັດກັມມະຖານ ທັງພາຍໃນ ແລະ ຕ່າງປະເທດ

-ກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ຈະໄດ້ປະສານສົມທົບກັບກັມມາທິການປົກຄອງສົງ,ກັມມາທິການສຶກສາສົງ, ກະຊວງພາຍໃນ, ສູນກາງແນວລາວສ້າງຊາດ ເພື່ອຮ່ວມມືກັນໃນການເຮັດວຽກ ແລະ ວາງແຜນການຈັດຕັ້ງຄະນະຮັບຜິດຊອບເຄື່ອນໄຫວເຜີຍແຜ່ພຸດທະທັມ.

ໃນທີ່ປະຊຸມຍັງໄດ້ມີການປະກອບຄຳເຫັນດ້ານດີ ແລະ ດ້ານຄົງຄ້າງ ຈາກ ຫ້ອງການບໍລິຫານສູນກາງ ອພສ,

ກັມມາທິການສາທາລະນຸປະການ,ກັມມາທິການສຶກສາສົງ,ກັມມາທິການປົກຄອງສົງ,ກັມມາທິການຕ່າງປະເທດ ແລະ ຕ່າງຫນ້າເຈົ້າຄະນະ ນະຄອນຫຼວງວຽງຈັນ. ນອກນັ້ນ ຍັງໄດ້ມີການປະກອບຄຳຄິດເຫັນ ຈາກ ສູນກາງແນວລາວສ້າງຊາດ,ຕ່າງຫນ້າກະຊວງພາຍໃນ,ຄອບຄົວການນຳ ແລະ ຜູ້ຊົງຄຸນວຸດທິ.

ໃນກອງປະຊຸມຍັງໄດ້ຮັບຄວາມເມດຕາຈາກ ພຣະຫຼັກແກ້ວສຸເມທາທິບໍດີ (ມະຫາບຸນມາ ສິມມາພົມ) ຮັກສາການປະທານສູນກາງ ແຫ່ງ ສປປ ລາວ. ໄດ້ມອບໃບກິດຕິຄຸນ ໃຫ້ແກ່ ຄະນະກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ແລະ ວັດຕ່າງໆ ເພື່ອຍົກຍ້ອງ ແລະ ຈາລຶກຄຸນງາມຄວາມດີ ທີ່ໄດ້ປະກອບສ່ວນຢ່າງຕັ້ງຫນ້າ ເລິກເຊິງຮອບດ້ານ ໃນການເຄື່ອນໄຫວວຽກງານຂອງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ອພສ ໃນໄລຍະ 5 ປີ ຈຳນວນ 80 ອົງ/ທ່ານ.ແລະ ໄດ້ຮັບຄວາມເມດຕາໂອ້ລົມໃນທີ່ປະຊຸມ. ພ້ອມດ່ຽວກັນນີ້ ພຣະຫຼັກແກ້ວມະຫາວໍລະຍານາທິບໍດີ(ມະຫາເຫວດ ມະເສໄນ) ຍັງໄດ້ມອບໃບກຽດຕິຄຸນໃຫ້ແກ່ຜູ້ມີສ່ວນຮ່ວມປະກອບສ່ວນປັດໄຈ ແລະ ອຸປະຖັມການຄື່ອນໄຫວວຽກງານຂອງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ. ເພື່ອຈາລຶກຄຸນງາມຄວາມດີໄວ້ໃນບໍວອນພຸດທະສາສະໜາ.

ກອງປະຊຸມສະຫຼຸບວຽກງານໄລຍະ 5 ປີ ຂອງກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ ອພສ ໄດ້ອັດລົງດ້ວຍຜົນສຳເລັດຢ່າງສູງ.