ສະເຫຼີມສະຫຼອງວັນວິສາຂະບູຊາ ແລະ ບຸນຜ້າປ້າສາມັກຄີ ທີ່ເມືອງບຸນເໜືອ ແຂວງຜົ້ງສາລີ
ເນື່ອງໃນວັນວິສາຂະບູຊາທີ່ຫາກໍຜ່ານມານີ້ ອົງການພຸດທະສາສະໜາສັມພັນລາວ ແຂວງຜົ້ງສາລີ ຮ່ວມກັບ ກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ສູນກາງ ອພສ. ໄດ້ຈັດພິທີສະເຫຼີມສະຫຼອງວັນວິສາຂະບູຊາ ວັນສໍາຄັນຂອງໂລກ ປະຈໍາປີ ພສ. 2566 ຄຽງຄູ່ກັບບຸນຜ້າປ້າສາມັກຄີ ເພື່ອປະກອບສ່ວນເຂົ້າໃນວຽກງານບໍລິຫານ ອພສ. ແຂວງຜົ້ງສາລີ ໃນລະຫວ່າງວັນທີ 12-13 ພຶດສະພາ 2023 ທີ່ເທດສະບານເມືອງບຸນເໜືອ ແຂວງຜົ້ງສາລີ.
ວັນວິສາຂະບູຊາ
ພິທີດັ່ງກ່າວໄດ້ເລີ່ມຕົ້ນໃນຕອນບ່າຍຂອງວັນທີ 12 ພຶດສະພາ ທີ່ສໍານັກງານອົງການປົກຄອງແຂວງຜົ້ງສາລີ ໂດຍເປັນການຮັບຟັງປາຖະກະຖາທັມ ກ່າວເຖິງຄວາມໝາຍຄວາມສໍາຄັນຂອງວັນວິສາຂະບູຊາ ທີ່ໄດ້ຮັບຄວາມເມດຕາປາຖະກະຖາໂດຍ ພຣະອາຈານໃຫຍ່ມະຫາເຫວດ ມະເສໄນ ຮອງປະທານ ສູນກາງ ອພສ. ອົງຊີ້ນຳວຽກງານ ເຜີຍແຜ່ສີລະທັມ ແລະ ປະຕິບັດກັມມະຖານ ສູນກາງ ແລະ ຊີ້ນໍາວຽກງານສາທາຣະນູປະການສູນກາງ ສູນກາງ ໂດຍການເຂົ້າຮ່ວມຂອງຄະນະສົງຈາກສູນກາງ ອພສ ນໍາໂດຍ ຮອງຫົວໜ້າກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ສູນກາງ, ຍັງມີຄະນະສົງຈາກ ອພສ. ແຂວງຜົ້ງສາລີ, ທາງຜ່າຍຄາລະວາດມີການນຳຂັ້ນແຂວງ ຂັ້ນເມືອງ ແລະ ອົງການຈັດຕັ້ງທຸກພາກສ່ວນທີ່ກ່ຽວຂ້ອງເຂົ້າຮ່ວມຮັບຟັງປາຖະກະຖາທັມ ເພື່ອສ້າງຄວາມຮູ້ ຄວາມເຂົ້າໃຈ ກ່ຽວກັບຄວາມໝາຍຄວາມສຳຄັນ ຂອງວັນປະສູດ ຕັດສະຮູ້ ແລະ ປະຣິນິພານຂອງອົງສົມເດັດ ສັມມາສັມພຸດທະເຈົ້າ
ນອກນັ້ນ, ຍັງໄດ້ຮັບຟັງການປະກອບຄໍາຄິດຄໍາເຫັນຈາກ ພຣະອາຈານ ດວງຈັນ ວົງພາສີ ປະທານ ອພສ. ແຂວງຜົ້ງສາລີ ແລະ ທ່ານ ຄໍາຜອຍ ວັນນະສານ ເຈົ້າແຂວງໆຜົ້ງສາລີ ຕໍ່ກັບປາຖະກະຖາທັມ ແລະ ຕໍ່ກັບວັນວິສາຂະບູຊາ. ໃນຕອນທ້າຍຂອງພິທີປາຖະກະຖາ, ພຣະອາຈານ ດວງຈັນ ວົງພາສີ ໄດ້ຕາງໜ້າໃຫ້ຄະນະສົງໃນ ອພສ. ແຂວງຜົ້ງສາລີ ມອບຂອງທີ່ລະນຶກໃຫ້ແກ່ ພຣະອາຈານໃຫຍ່ມະຫາເຫວດ ມະເສໄນ ທີ່ປັນອົງປາຖະກະຖາ ພ້ອມດຽວກັນນີ້້ ພຣະອາຈານໃຫຍ່ເອງ ກໍໄດ້ຕາງໜ້າໃຫ້ຄະນະສົງຈາກກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ສູນກາງ ມອບປຶ້ມພຸດທະທັມ ສະບັບພາສາລາວ ເພື່ອເປັນຂອງທີ່ລະນຶກໃຫ້ແກ່ ຄະນະ ອພສ. ແຂວງຜົ້ງສາລີ. ຫຼັງສຳເລັດການຮັບຟັງປາຖະກະຖາເປັນທີ່ຮຽບຮ້ອຍ ໄດ້ມີພິທີແຫ່ກອງຜ້າປ່າສາມັກຄີອ້ອມຮອບເທດສະບານເມືອງບຸນເໜືອເຂົ້າສູ່ວັດໂພນທອງວະນາຣາມ ຫຼືວັດບ້ານໂພນໂຮມ ກ່ອນຈະນຳຖວາຍແດ່ຄະນະສົງ ເພື່ອປະກອບສ່ວນປັດໄຈເຂົ້າໃນວຽກງານບໍລິຫານ ຂອງ ອພສ. ແຂວງຜົ້ງສາລີ ເຊິ່ງຂະບວນແຫ່ໃນຄັ້ງນີ້ໄດ້ປະດັບປະດາດ້ວຍປ້າຍທີ່ສະແດງເຖິງຄວາມໝາຍຄວາມສໍາຄັນຂອງວັນວິສາຂະບູຊາ ຄືປ້າຍປະສູດ ປ້າຍຕັດສະຮູ້ ແລະ ປ້າຍປະຣິນິພານ ເພື່ອເປັນການລະນຶກເຖິງວັນວິສາຂະບູຊາ ກໍຄືລະນຶກເຖິງພຣະພຖດທະເຈົ້າ. ນອກຈາກນີ້ແລ້ວ ໃນຕອນແລງຂອງວັນດຽວກັນ, ພຣະອາຈານ ບຸນທະວີ ສີບຸນເຮືອງ ຮອງຫົວໜ້າກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານ ສູນກາງ ກໍໄດ້ເມດຕານຳພາອອກຕົນຍາດໂຍມຈະເລີນສະມາທິ ພາວະນາ ເພື່ອເປັນການປະຕິບັດບູຊາ ແລະ ຖືເປັນອັນຈົບພິທີໃນມື້ທໍາອິດ.
ສະເຫຼີມສະຫຼອງວັນວິສາຂະບູຊາ ແລະ ບຸນຜ້າປ້າສາມັກຄີ ທີ່ເມືອງບຸນເໜືອ ແຂວງຜົ້ງສາລີ
ສ່ວນໃນຕອນເຊົ້າຂອງມື້ຕໍ່ມາ ທີ່ວັດໂພນທອງວະນາຣາມ, ໄດ້ມີພິທີຖວາຍກອງຜ້າປ່າສາມັກຄີ, ກອງອັດຖະ ແລະ ປັດໄຈໄທຍະທານຕ່າງໆໃຫ້ແດ່ຄະນະສົງ ກ່ອນທີ່ ພຣະອາຈານໃຫຍ່ມະຫາເຫວດ ມະເສໄນ ຈະໄດ້ເມດຕາສະແດງທັມມະເທສະໜາ ວ່າດ້ວຍການໃຫ້ທານ ແລະ ການປະຕິບັດທັມ ເຊິ່ງເປັນມຸງຄຸນອັນສູງສຸດໃນຊີວິດ. ຫຼັງຈາກນັ້ນ, ທ່ານເຈົ້າແຂວງໆຜົ້ງສາລີ ຈຶ່ງໄດ້ນຳພາ ການນຳຂັ້ນແຂວງ ຂັ້ນເມືອງ ອົງການຈັດຕັ້ງທີ່ກ່ຽວຂ້ອງ ພ້ອມດ້ວຍເຈົ້າພາບເຈົ້າສັດທາ ແລະ ອອກຕົນຍາດໂຍມ ຮ່ວມພິທີໃສ່ບາດຢູ່ດ້ານໜ້າສາລາໂຮງທໍັມ. ເຊິ່ງເນື່ອງໃນໂອກາດອັນດີນີ້ ພຣະອາຈານໃຫຍ່ມະຫາເຫວດ ມະເສໄນ ຍັງໄດ້ນໍາພາຄະນະສົງຈາກສູນກາງ ອພສ. ລົງຢ້ຽມຢາມສະຖານທີ່ສຶກສາສົງທີ່ກຳລັງຢູ່ໃນຂະບວນການກໍ່ສ້າງຢູ່ທີ່ວັດໂພນທອງວະນາຣາມ ບ້ານໂພນໂຮມ ເມືອງບຸນເໜືອ ແຂວງຜົ້ງສາລີ.
