ວັນທີ່ 22 ກຸມພາ 2021 ຜ່ານມານີ້ ໂຮງຮຽນນິລະດາ ເມືອງໄຊເສດຖາ ນະຄອນຫຼວງວຽງຈັນ
ໄດ້ເປີດໂຄງການສອນທຳມະໃຫ້ນັກຮຽນ ແລະ ຄູອາຈານ ເພື່ອໃຫ້ນັກຮຽນໃຊ້ເວລາວ່າງໃຫ້ເກີດປະໂຫຍດ ແລະ ບໍ່ຫຍຸ້ງກ່ຽວກັບສິ່ງເສບຕິດ ເພື່ອພັດທະນາຄວາມຮູ້ ຄວາມສາມາດ ຂອງນັກຮຽນເຮັດໃຫ້ມີຄວາມຮູ້ກ່ຽວກັບ ພຣະພຸດທະສາສະຫນາທີ່ແທ້ຈິງ ສາມາດປ່ຽນແປງທັດສະນະຄະຕິ ແລະ ພຶດຕິກໍາໃນທາງທີ່ດີ. ເພື່ອປູກຝັງຄຸນະທໍາທາງສາດສະຫນາໃຫ້ງອກງາມໃນຈິດໃຈຂອງນັກຮຽນ ໃຫ້ເປັນລູກທີ່ດີຂອງພໍ່ແມ່ ແລະ ເປັນລູກສິດທີ່ດີຂອງຄູ – ອາຈານ , ເປັນຜູ້ ສຶບທອດພາລະກິດຂອງຊາດ ແລະ ເປັນທາຍາດທີ່ດີຂອງພຣະພຸດທະສາດສະຫນາ.
ໂດຍໄດ້ຮັບຄວາມເມດຕາຈາກ ພຣະຫຼັກແກ້ວມະຫາວໍລະຍານາທິບໍດີ (ມະຫາເຫວດ ມະເສໄນ ) ອົງຊີ້ນຳລວມ ຮອງປະທານອົງການພຸດທະສາສະໜາສຳພັນແຫ່ງ ສປປ ລາວ,ພຣະຍອດຄຳ ສີທົນ ໄຊຍະວົງສອນ ຫົວຫນ້າກັມມາທິການເຜີຍແຜ່ສີ່ລະທັມ ແລະ ປະຕິບັດກັມມະຖານ,ພຣະຍອດຄຳ ບຸນທະວີ ປະສິດທິສັກ ຫົວຫນ້າກັມມາທິການສາທາລະນູປະການ ພ້ອມດ້ວຍ ພຣະເຖຣານຸເຖຣະເຂົ້າຮ່ວມ.
ຝ່າຍຄະລະວາດຮ່ວມເປັນປະທານເປີດພິທີໂດຍ ທ່ານ ສີຕາເຮັ່ງ ຣາຊະພົນ ປະທານກິດຕິມະສັກ ພ້ອມດ້ວຍການນຳ ທ່ານ ບຸນທັນ ແສງມະນີ ຮອງຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ, ຫົວໜ້າສຶກສາທິການ ແລະ ກິລາ ເມືອງໄຊເສດຖາ,ຮອງຫົວໜ້າສຶກສາທິການ ແລະ ກິລາ ເມືອງຈັນທະບູລີ ,ຫົວໜ້າສະມາຄົມການສຶກສາ ເອກະຊົນ ເມືອງໄຊເສດຖາ,ຫົວໜ້າສະມາຄົມການສຶກສາ ເອກະຊົນ ເມືອງຈັນທະບູລີ ແລະ ແຂກທີ່ຖືກເຊີນເຂົ້າຮ່ວມຢ່າງພ້ອມພຽງ.
ໃນໂຄງການ ດັ່ງກ່າວ ນັກຮຽນ ແລະ ຄູອາຈານ ຈະໄດ້ຮຽນຮູ້ທັງພາກທິດສະດີ ແລະ ພາກປະຕິບັດ ພາກທິດສະດີ ເຊີ່ງມີເນື້ອໃນກ່ຽວກັບ ບຸນຄຸນພໍ່ແມ່ ແລະ ບຸນຄຸນຄູ – ອາຈານ, ການຮັກໃນພຣະພຸດທະສາສະຫນາ,ການປະຕິບັດຫນ້າທີ່ຂອງຕົນເອງໃຫ້ດີທີ່ສຸດ,ຮີດຄອງປະເພນີລາວ, ການເປັນໂຕຂອງໂຕເອງ ບໍ່ບ່ຽງເບນໄປຕາມຫມູ່ເພື່ອນ ແລະ ສິລ 5 ຂໍ້. ພາກປະຕິບັດ ຝຶກການນົບ ການໄຫວ້, ການນັ່ງສະມາທິ ແລະ ການໃຊ້ຄໍາສັບຂອງພຣະສົງ.
ວິທະຍາກອນສົງທີ່ຈະສົ່ງມອບຄວາມຮູ້ໃນໂຄງການສອນທັມມະໃຫ້ນັກຮຽນ ແລະ ຄູອາຈານ ໂຮງຮຽນນິລະດາ ບ້ານສີບຸນເຮືອງ ເມືອງຈັນທະບູລີ ແລະ ໂຮງຮຽນນີຣະດາ ບ້ານຈອມມະນີ ເມືອງໄຊເສດຖາ ຈາກກໍາມາທິການເຜີຍແຜ່ສີລະທໍາ ແລະ ປະຕິບັດກໍາມະຖານສູນກາງ ແລະ ວັດປ່ານາຄູນນ້ອຍ.
ນັກຮຽນ ແລະ ຄູອາຈານທີ່ຜ່ານໂຄງການສອນທຳມະໃນໂຮງຮຽນດັ່ງກ່າວ ນັກຮຽນຈະສາມາດມີຄວາມຮູ້ ຄວາມເຂົ້າໃຈຕໍ່ຫລັກທໍາຄໍາສອນ ແລະ ສາມາດນໍາຫລັກທໍາໃນທາງພຣະພຸດທະສາສະຫນາໄປໃຊ້ໃນຊີວິດປະຈໍາວັນໄດ້ ເຊິ່ງຈະເປັນການຊ່ວຍແກ້ໄຂບັນຫາໄພສັງຄົມໄດ້ເຊັ່ນ: ແກ້ໄຂ້ ບັນຫາຄວາມບໍ່ສະຫງົບໃນຫ້ອງຮຽນ, ໃນຄອບຄົວ ແກ້ໄຂບັນຫາຄວາມບໍ່ສະຫງົບທາງດ້ານຈິດໃຈ,ແກ້ໄຂ້ບັນຫາຢາເສບຕິດ, ແກ້ໄຂ້ບັນຫາການຫນີຮຽນ ແລະ ແກ້ໄຂບັນຫາການປະພຶດຜິດຕໍ່ລະບຽບຂອງນັກຮຽນ.
ນອກຈາກນັ້ນໂຮງຮຽນນີຣະດາຍັງໄດ້ຖວາຍປັດໄຈຈຳນວນ 30,000,000 ກີບ ໃຫ້ ກັມມາທິການເຜີແຜ່ສີລະທັມ ແລະ ປະຕິບັດກັມມະຖານ ສູນກາງ ເພື່ອຕໍ່ຍອດໃນວຽກງານເຜີຍແຜ່.
ອາລະບັ້ບພາບ
