ໃນພາວະວິກິດຂອງປະເທດຊາດ ກໍ່ຄືການລະບາດຂອງພະຍາດໂຄວິດ-19 ເຮັດໃຫ້ໂຮງຫມໍ ແລະ ໜ່ວຍງານທີ່ກ່ຽວຂ້ອງ ອາດຈະເດືອດຮ້ອນ ຂາດເຂີນຂອງໃຊ້ຈຳເປັນ ເຂົ້າໃນວຽກງານສະເພາະກິດຕ້ານພະຍາດໂຄວິດ-19 . ຈຳເປັນທີສຸດ ຖ້າຈະມີໜ່ວຍງານໃດ່ ຫຼື ບຸກຄົນໃດ່ຜູ້ມີຊັບຫຼາຍ ມີຄວາມເອື້ອເຟື້ອຕໍ່ສັງຄົມ ຊ່ວຍກັນຂົນຂວາຍ ວັດຖຸ ອຸປະກອນທີ່ຈຳເປັນ.ທັງນີ້ໃນທາງຄະນະສົງ ແລະວັດຕ່າງໆ ກໍ່ບໍ່ໄດ້ນິ່ງນອນໃຈຕໍ່ປັນຫາສັງຄົມດັ່ງກ່າວ.
ໂດຍເມື່ອວັນທີ່ 29 ເມສາ 2021 ທີ່ຜ່ານມານີ້ ທາງຄະນະສົງວັດສີສະເກດ ແລະ ສິດສານຸສິດ ນຳໂດຍພຣະຫລັກແກ້ວມະຫາເຫວດ ມະເສໄນ ຮອງປະທານ ອົງຊີ້ນຳວຽກງານກັມມາທິການເຜີຍແຜ່ສີລະທັມແລະປະຕິບັດກັມມະຖານ ສູນກາງ ອພສ, ເຈົ້າອະທິການວັດສີສະເກດ ໄດ້ມອບຜ້າຫົ່ມ 12 ຊຸດ ແລະ ໝອນ 16 ຫນ່ວຍເພື່ອຫມູນໃຊ້ເຂົ້າໃນວຽກງານຂອງໂຮງຫມໍ 5 ເມສາ (109) ໂດຍຕ່າງຫນ້າຮັບໂດຍ ດຣ. ພັນໂທ ຂັນທະລີ ຄູນໄຊຍະບົວສີ.
ແລະ ຍັງມີສິດສານຸສິດ ຍາທ່ານໃຫຍ່ ດຣ ມະຫາຊາລີ ກັນຕະສີໂລ ນຳພາໂດຍ ພຣະຍອດຄຳ ສຸນທະຣະຍານ ສີທົນ ໄຊຍະວົງສອນ ຫົວໜ້າກັມມາທິການເຜີຍແຜ່ສີລະທັມ ແລະ ປະຕິບັດກັມມະຖານສູນກາງ, ເຈົ້າອະທິການ ປ່ານາຄູນນ້ອຍ ພ້ອມດ້ວຍຄະນະສົງວັດປ່ານາຄູນນ້ອຍ ໄດ້ເດີນທາງໄປມອບ ເຈວລ້າງມື້, ຜ້າປິດປາກ, ດັງ ແລະນ້ຳດື່ມ ໃຫ້ແກ່ໂຮງໝໍນາຊາຍທອງ ເມືອງນາຊາຍທອງ ນະຄອນຫລວງວຽງຈັນ.
ແລະ ເມື່ອ ວັນທີ 30 ເມສາ 2021 ທີ່ຜ່ານມາ ອົງການພຸດທະສາສະໜາສັມພັນລາວ ເມືອງສີສັດຕະນາກ ຮ່ວມກັບ ອົງການຈັດຕັ້ງພັກ-ລັດ ເມືອງສີສັດຕິນາກ ເຂົ້າມອບເຄື່ອງ ເສນາຊະນະ ແລະ ເຄື່ອງອຸປະໂພກ ບໍລິໂພກ ລວມ11 ລາຍການ ມູນຄ່າ 14,015,000ກີບ ມອບໃຫ້ ໂຮງໝໍ 5ເມສາ (ໂຮງໝໍ109) ຕ່າງໝ້າຮັບເຄື່ອງໂດຍ ດຣ.ນ. ພຸດມາລາ ພັນທະມິດ ເຄື່ອງດັ່ງກ່າວນີ້ ມອບເພື່ອການຊ່ວຍເຫຼືອສັງຄົມທີ່ຕ້ອງການເພື່ອໃຫ້ເກີດປະໂຫຍດສູງສຸດ ໃນສະພາວະວິກິດ ໂຄວິດ-19 ລະບາດ.
